హేమంత ఋతువునందున, సీమంతిని పృకృతికాంత మోదముతోనన్.
చేమంతులు, బంతుల పూబంతులతో మురిసి విరిసె, చూడగరారే..
రంగవల్లికలతో అలరారు ముంగిళ్ళ అరుదెంచుచున్న హేమంతలక్ష్మి
పదస్పర్శకై తనిసి పూల దోసిళ్ళతో నేలవ్రాలెనొ యేమొ కీరపంక్తి..
రాయంచ కులుకు నడకల రాచరికపు ఠీవి తోడ రసరమ్యముగా
రాకాశశివదన సుధా సాకారతనొందె రమణి హేమంతమునన్..
కన్నెగొంతుల మధురమౌ గీతములను, వన్నె తరుగని హరిదాసు గానములను,
పిన్న పాపల కేరింత గారములను, కన్నులారంగ వీక్షించె పౌష్యలక్ష్మి..
జున్ను పాల మీగడలంటి ప్రణయములను, వెన్ను దన్నుగానిలచిన పంటచేల,
మిన్నులంటెడు గిత్తల స్పర్ధ రొదల మనము రంగిల్ల ప్రేక్షించె పౌష్యలక్ష్మి..
గంగిరెద్దుల విన్యాసలాఘవముల రేగు పండ్లతో భోగి పేరంటములను,
అందచందాల బొమ్మల కొలువు చెలువు, డెందమున నిలిపి మురిసెలే పౌష్యలక్ష్మి....
               'డాక్టర్ పుట్టపర్తి నాగపద్మిని..2015 సంక్రాంతి 
  





  

..